我的醒目老豆

寫這篇，完全為歌頌我老豆是如何醒目‧

話說今日下午我正跟別人做訪問，電話突然響起，一聽，是老豆聲音，我已覺得奇怪——這段時間，從不跟他談電話的。

「喂，阿斌，你聽住。啱啱我遇到一個電話騙案。有人話綁架細佬乜乜乜……如果有人打俾你，你唔使理佢得嘞。」

「哦……哦……哦。」

一來，我正在專心地做訪問，二來我深知我這個老豆實在是個「醒人」——由細到大，很多事情他都能自己一個人處理得妥妥當當。我「哦哦哦」幾聲，阿仔聽命，實情是，阿仔不知幾放心。

做完訪問後一直沒致電回家。回到家後，才問老豆究竟搞乜鬼。

老豆當夜更的士司機。下午兩點幾才起身。原來，今日下午一點幾，當我老豆睡得模模糊糊時，接到一個電話。

「喂，係咪阿基（我細佬）老豆？佢而家欠人家錢廿幾萬，你快啲同佢籌錢還……」

「喂……爸爸呀……救我呀……」

「阿基老豆，你唔好收線呀，嗱嗱臨去銀行拿錢來……」

老豆話，一路跟那邊談，一路都信以為真。一來那邊說得出「阿基」；二來我們通常也是叫「爸爸」，而不是 “Daddy”、「阿爸」等其他稱呼；三來，據我老豆說，那把救命聲的語調，的確好似我弟弟。

「俾着我，肯定慌到唔知點算。」我媽說。

「媽咪，我認為俾着你，我肯定你會驚到『彪尿』！」這個阿仔心底卻說：我不『彪尿』，也會不知所惜呢！

「呢啲情況，一係俾錢佢，一係報警。」其實，我最討厭我老豆下下以為自己說的就是真理的性格，但在今次事件中，他平常那份自以為是的性格，卻成為一種遇到麻煩時保持鎮定的姿態。

「我那時咪一路hold住條線，一路話我去緊銀行攞錢，又話廿萬無喎乜乜乜……但其實我一路行緊去差館。Hold住時間很長，佢唔知係咪意會到有什麼勢色不對……竟然話搞錯咗，用粗口鬧咗我一輪，之後就cut咗線嘞！」

老豆去到差館，立即報案，同時打電話給細佬。細佬說根本無什麼欠人家錢的事。警察叔叔跟我老豆講：「呢啲騙案，我哋差唔多日日接啦……」

我這樣想：其實那班友根本想食「大茶飯」，但又不夠膽。被我老豆拖延時間，有意無意地「大」了幾嘢，被「拋窒」了，自己就慌。唉，其實班友想玩成功這遊戲，最重要是同對方鬥命硬嘛！也沒有破釜沈舟的決心，如何「出嚟撈」呀？

話說回頭，我是想我細佬某些資料一定是外洩了，或者是被某些朋友出賣。唉，無論如何，他日一定要小心。

我老豆就確實醒目在不會慌，事事頭腦清醒。做他兒子的我，沒有十足的遺傳，只能向他多多學習。寫這篇時的晚上，老豆放假，正在睡覺。過了有驚無險的一個下午，希望他睡個酣甜，發個好夢，好好休息吧。